ЭЪТИБОР БА РУШДИ ФАРҲАНГ

                       Бадахшон, 8 май. (АМИТ «Ховар», Лутфишо Додо).- Ба бӯҳрони шадиди ҷаҳонии иқтисодӣ нигоҳ накарда, дар ВМКБ ба хотири бунёду таъмири биноҳои муассисоти фарҳанг эътибори ҷиддӣ медиҳанд. Ба наздикӣ Раёсати фарҳанги вилоят соҳиби бинои нави замонавӣ гардид, ки аз 14 утоқи корӣ ва толори барҳавои консертӣ иборат аст. Мақомоти маҳаллии ҳокимияти давлатии шаҳру навоҳӣ ва вилоят масъалаи бунёду таъмири муассисоти фарҳангиро на танҳо бо маблағи давлат, балки бо маблағи созмонҳои ҷаҳонӣ низ ҳаллу фасл менамоянд. Чунончӣ, Созмони ҷаҳонии СИДА ба хотири таъмири Хонаи фарҳанги қарияи Нишуспи ноҳияи Шуғнон 9100 долларо ҷудо намуд. Тавре аз идораи фарҳанги ноҳия иттилоъ доданд, то Рӯзи Истиқлолият таъмири Хонаи маданият сомон дода мешавад.