ИХТИРОЪКОРИИ ХУРШЕД

                      Душанбе, 19 май.(АМИТ «Ховар», Марзия Саидова).-Дар Тоҷикистон нахустин барномаи талаффузи компютерии матни тоҷикӣ ихтироъ гардида, мавриди истифода қарор дода шуд.                       Ихтироъкори барномаи мазкур муаллими калони кафедраи барномасозӣ ва технологияи иттилоотии филиали дар Хуҷанд будаи Донишгоҳи технологии Тоҷикистон, унвонҷӯи ин Донишгоҳ Хуршед Худойбердиев аст. Ихтирои Хуршед Худойбердиев барои хоҳишмандон имкон медиҳад, ки талаффузи садоии ҳама гуна матни тоҷикиро тариқи комютер бишнаванд. Дар ихтирои барномаи мазкур мегӯяд, Х. Худойбердиев ба ман устодам доктори илмҳои физика ва математика, профессори Академияи илмҳои ҷумҳурӣ Зафар Усмонов кӯмак намуданд. Барномаи талаффузи компютерии матни тоҷикӣ барои шахсони нерӯи босираашон суст ва ё аз узви бинои маҳрум ва барои онҳое, ки хоҳиши омӯхтани забони тоҷикиро доранд, тавсия карда мешавад, бахусус аз нуқтаи назари грамматика, фонетика ва морфология. Ин барнома дар тӯли се сол ихтироъ гардида, дорои 3259 ҳиҷо аст. Олими ҷавон афзуд, ки ҳарчанд то имрӯз барномаҳои луғавии тоҷикӣ истифода мешуданд, аммо ворид кардани матни садоии тоҷикӣ аввалин маротиба аст. Тӯли ним сол аст, ки аз барномаи ихтироъ намудаи Хуршед аъзои ҷамъияти нобиноёни ҷумҳурӣ истифода менамоянд. Муштариён метавонанд иттилоъи бештареро доир ба ин барнома дар сомонаи интернетии tajik-tts.narod.ru пайдо намоянд.