КӮМАКИ ҲУКУМАТИ ҶУМҲУРӢ БА ЗАРАРДИДАГОН

                    Душанбе, 7 май. (АМИТ «Ховар»). — Президенти Ҷумҳурии Тоҷикистон, Раиси Ҳукумати мамлакат Эмомалӣ Раҳмон барои ҷудо намудани қарзи имтиёзнок ва кӯмакпулии якдафъаина ба оилаҳое, ки аз боришоти боронҳои зиёд ва фаромадани ярч хонаҳояшон зарар дидааст, фармоиш имзо намуд.                    Мутобиқи ин фармоиш 377 450 сомонӣ маблағ ҷудо мегардад, ки ба ҳар як оилаи ду деҳаи ҷамоати Айнии ноҳияи Хуросон, ки хонаҳояшон дар натиҷаи боришоти зиёд ва фаромадани ярч пурра ва ё қисман зарар дида буд, тақсим карда мешавад. Ба ҳар як оилаи зарардида 3000 сомонӣ қарзи имтиёзнок ва вобаста ба андозаи зарар аз 150 то 650 сомонӣ кӯмакпулии якдафъаина дода мешавад.                     Вазорати молия, Бонки давлатии Амонатгузории «Амонатбонк» ва Кумитаи ҳолатҳои фавқулодда ва мудофиаи гражданӣ вазифадор гардиданд, ки дастрас кардани маблағҳои мазкурро ба оилаҳои зарардида таъмин намоянд.                     Хотиррасон мекунем, ки шаби 21 — ум ба 22 — юми апрели соли равон дар ду деҳаи ҷамоати Айнии ноҳияи Хуросони вилояти Хатлон дар натиҷаи боришоти зиёд ва фаромадани ярч 22 хона пурра ва 65 хонаи дигар қисман вайрон шуда буд.                      Дар ин 87 хонаи зарардида 114 оила зиндагӣ мекардаанд, ки шумораи онҳо 595 нафарро ташкил медиҳад.                     Дар ин бора ба АМИТ «Ховар» аз Хадамоти матбуоти Президенти Ҷумҳурии Тоҷикистон иттилоъ доданд.