МУҲОКИМАИ ВАЗЪИЯТИ АФҒОНИСТОН ДАР ДУМАИ ДАВЛАТИИ РУСИЯ

                    Маскав, 7 май. (АМИТ «Ховар», Ҳалима Хушқадамова). — Вакилони Думаи давлатии Федератсияи Русия дар маҷлиси навбатии худ вобаста ба афзудани ҳаҷми интиқоли маводи нашъадор аз Афғонистон ва таҳдиди он ба амнияти байналхалқӣ қарор қабул намуданд. Дар маҷлис тамоили манфии афзоиши масоҳати парвариши кӯкнор ва зиёд гардидани истеҳсоли афюн дар ин мамлакат таъкид карда мешавад.                     Дар ҳуҷҷат омадааст, ки хабарҳои умедворкунанда дар бораи кам кардани парвариши кӯкнор ва истеҳсоли героин дар вилоятҳои шимолии Афғонистон бо маълумоти аниқ дар бораи зиёд гардидани ҳаҷми истеҳсоли навъи дигари маводи нашъадор — банг ва афюн ва аз онҳо ҳосил кардани марихуана рад карда мешавад. Бояд гуфт, ки Афғонистон аз ҷиҳати истеҳсоли марихуана дар миқёси ҷаҳон яке аз ҷойҳои авалинро ишғол менамояд.                    Зиёда аз ин, маҳз дар ҳамин вилоятҳои бо Тоҷикистону Ӯзбекистон ҳамсарҳад озмоишгоҳҳо ва корхонаҳои нисбатан муҷаҳҳазу ҳозиразамон барои истеҳсоли маводи пуртаъсири героин аз кӯкнори дар вилоятҳои ҷанубӣ парвариш кардашуда воқеъ гардидаанд.                      Дар қарори Думаи давлатӣ таъкид карда мешавад, ки мубориза ба муқобили афзоиши ҳаҷми интиқоли маводи нашъадор аз Афғонистон вазифаи умумии тамоми ҷомеаи ҷаҳон мебошад ва пешгирии он андешидани амалиёти якҷояю муштарак ва самарабахшро тақозо менамояд.