МУСОБИҚАИ СОБИҚАДОРОН

                Хуҷанд, 4 май. (АМИТ «Ховар», Мирзалӣ Амонов, Самад Юсуфӣ).- Бо ташаббуси Мақомоти иҷроияи ҳокимияти давлатии вилояти Суғд, Раёсати ҷавонон варзиш ва сайёҳии вилоят, роҳбарияти Муассисаи давлатии «Маркази Ҷавонон» ва сарпарастии компанияи телефонии «МЛТ» бахшида ба бузургдошти «Имоми Аъзам», Рӯзи Ғалаба, 10-солагии Муассисаи давлатии «Маркази Ҷавонон» мусобиқаи шоҳмот байни куҳансолон-ветеранҳои ҷангу меҳнат ва ҷавонон баргузор гардид.             Дар ин мусобиқа бештар аз 50 нафар варзишгарони синну соли гуногун ширкат варзиданд, аксарияти онҳо бо дастовезҳои идона сарфароз гардиданд. Дар ҷамъбасти мусобиқа ҷои аввал насиби сокини шаҳри Хуҷанд мураббӣ Муҳаммадсабур Юлдошев гардид. Ҷои дуюмро Никифоров Анатолий Георгиевич аз шаҳри Чкалов ва ҷои сеюмро Абдулло Холдоров аз ноҳияи Бобоҷон Ғафуров ишғол намуданд.            Мусобиқаи варзишии шоҳмот байни ҷавонон, ки бевосита аз тарафи директори Муассисаи давлатии «Маркази Ҷавонон» Саидумрон Саидов ташкил шуда буд, ҷамъбаст гардид. Ҷои аввал насиби Абдуалӣ Оқилов аз ҷамоати Қистакӯз, ҷои дуюм насиби Шӯҳрат Саидов аз шаҳри Хуҷанд, ҷои сеюм насиби Маъруфҷон Иномҷонов аз шаҳраки Ғафуров гардид.  Санъаткорони вилоят бо сурудҳои худ табъи иштирокчиёнро болида намуданд.