НИШОНИ «АЪЛОЧИИ МАОРИФИ ИДМ» ТАЪСИС МЕЁБАД

                      Маскав, 14 май. (АМИТ «Ховар», Ҳалима Хушқадамова). — Имрӯз дар Китобхонаи миллии Белорусия дар мавзӯи «Маълумоти касбии техникӣ ва маълумот барои рушди устувор» конфронси байналхалқӣ гузаронида мешавад. Дар он масъалаҳои ҳамкории давлатҳои ИДМ дар соҳаи маориф, илм, нуктаҳои асосии барномаи рушди иқтисодии ИДМ, гузаронидани Соли ҷавонон дар соли 2009 ва Соли илму технологияҳои нав дар соли 2010, тайёрӣ ба анҷумани нахустини муаллимон ва кормандони соҳаи маорифи мамлакатҳои ИДМ ва таъсиси нишони «Аълочии маорифи ИДМ» муҳокима карда мешаванд. Конфронс бо ташаббуси Вазорати маорифи Ҷумҳурии Белорусия, Дафтари ЮНЕСКО дар Маскав ва Бунёди байнидавлатии ҳамкории гуманитарии давлатҳои ИДМ гузаронида мешавад. Дар конфронси мазкур вазири маорифи Ҷумҳурии Тоҷикистон Абдуҷаббор Раҳмонов ширкат меварзад.