ОЗМУНИ ҶУМҲУРИЯВИИ ОҲАНГСОЗОН

                          Душанбе, 27 май. (АМИТ «Ховар», Лутфия Эшонқулова).- Вазорати фарҳанги ҶТ барои рушди мусиқии касбӣ, ғанӣ гардонидани барномаи муассисаҳои консертӣ бо асарҳои нав ва дарёфти асарҳои беҳтарини оҳангсозони муосир ва вусъат додани ҳамкориҳои эҷодии ҳунармандон ва муаллифон, барои эҷод кардани асарҳои нав дар жанрҳои опера, балет, асарҳои симфонӣ, вокалӣ, камеравӣ, хореографӣ, инструменталӣ озмуни ҷумҳуриявии оҳангсозонро бахшида ба 20-солагии Истиқлолияти давлатии Ҷумҳурии Тоҷикистон аз 1 июни соли 2009 то 1 июли соли 2010 эълон мекунад.                         Озмун аз 4 бахш — асари беҳтарини камеравӣ (ансамблҳои созҳои торӣ ё созҳои халқӣ), оҳанги беҳтарини рақсӣ (дар иҷрои ансамблҳои гуногуни созҳои мусиқӣ), суруди беҳтарин (бо ҳамовозии оркестрҳо ва ансамблҳои гуногун) ва асари беҳтарин барои оркестри созҳои миллӣ иборат аст.                         Муаллифон бояд асарҳояшонро то 1 июли соли 2010 ба Раёсати санъати Вазорати фарҳанг пешкаш намоянд.                           Озмун моҳи сентябри соли 2010 дар арафаи иди Истиқлолияти давлатии Ҷумҳурии Тоҷикистон ҷамъбаст карда мешавад.                            Ғолибон бо мукофотҳои пулӣ сарфароз хоҳанд шуд.                         Дар ин бора ба мухбири АМИТ «Ховар» аз маркази матбуоти Вазорати фарҳанг хабар доданд.