РОҲИ МУРҒОБ БАСТА ШУД

                     Бадахшон, 13 май. (АМИТ «Ховар», Лутфишо Додо).- Мавсими имсолаи истифодаи роҳи Қулма-Мурғоб оғоз гашт. Мошинҳои пурбор ағбаи хеле баланди Қулмаро паси сар карда, вориди ноҳияи Мурғоб гардиданд, аммо дар ин ҷо сахт дармонданд. Тавре навбатдори Раёсати гумруки назди Кумитаи гумруки ҷумҳурӣ дар Бадахшон лейтенанти хадамоти гумрукӣ Шодӣ Султоншоев иттилоъ дод, бар асари боронгариҳо ва шиддати шамол, ки барфро аз замин дар масофаи даҳҳо метр бар ҳаво бардошта, баъдтар рӯи роҳи мошингард гирд меовард, роҳ маҳкам шуд. Роҳ махсусан, дар мавзеи Муҳаммадзоҳир ва ағбаи Кӯҳтезак хеле вайрону валангор гаштааст. Техникаи пукриқтидори роҳсозӣ шабу рӯз кор мекунанд. Аммо шамолҳои сахт имкон намедиҳанд, ки мошинаҳо роҳи худро идома диҳанд.