САФАРИ ҲУНАРИИ ҲУНАРПЕШАГОНИ ТОҶИК

               Душанбе, 6 май. (АМИТ «Ховар», Таҳмина Ғоибназарова). — Дастаи ҳунарии «Гулшан» ва гурӯҳи раққосони «Зебо» ба сафари дарозмуддати ҳунарӣ ба шаҳру ноҳияҳо ва вилоятҳои Федератсияи Русия тайёрӣ мебинанд. Сафари ҳунарии онҳо 27 май таҳти унвони «Ситораборони Машриқзамин» шурӯъ мегардад.               Ҳунарпешагони тоҷик сафари ҳунарии худро аз ҷумҳурии Тотористон шурӯъ менамоянд. Баъд тамошобинони ҷумҳуриҳои Чувашистон, Бошқирдистон, вилояти Самара ва ҷумҳуриҳои шимоли Қафқоз ба ҳунарнамоии мутрибону овозхонон ва раққосони тоҷик кафкӯбӣ хоҳанд кард.               Ҳунарпешагони тоҷик зимни сафар ба тамошобинон рақсу сурудҳои тоҷикию эронӣ, афғонӣ, арабӣ, туркӣ ва ҳиндиро пешкаш менамоянд.               Сафари ҳунарии мазкурро Иттиҳодияи давлатии дастаҳои ҳунарии назди Вазорати фарҳанги ҷумҳурӣ бо дастгирии Вазорати фарҳанг ва муассисаҳои оммавии Федератсияи Русия ва сафоратхонаи ин мамлакат дар Тоҷикистон ташкил менамоянд.