ШӮРОИ АМНИЯТИ СММ ОЗМОИШИ АСЛИҲАИ ЯДРОИРО ДАР ҶХДК МАҲКУМ НАМУД

                       СММ, 26 май. (АМИТ «Ховар» — ИТАР — ТАСС ). — Аъзои Шӯрои амнияти СММ озмоиши навбатии зеризаминии аслиҳаи ядроиро дар Ҷумҳурии Халқии Демократии Куриё шадидан маҳкум карданд, ки 25 майи соли равон гузаронида шуд, гуфт намояндаи доимии Федератсияи Русия дар СММ Виталий Чуркин зимни сӯҳбат бо хабарнигорон.                          Ба ақидаи аъзои Шӯрои амният, ин иқдоми ҶХДК бар хилофи қатъномаи 1718 Шӯрои амният мебошад. Бинобар ин аз ин мамлакат талаб карда мешавад, ки ӯҳдадориҳои қаблан ба зимма гирифтаашро мувофиқи пешниҳодоти Шӯрои амният иҷро намояд.                          Хабар дода мешавад, ки Муншии умумии СММ Пан Ги Мун низ ин иқдоми Куриёи Шимолиро маҳкум намуд. Ӯ бо сабаби сафараш ба мамлакатҳои Аврупо дар машваратҳои Шӯрои амният иштирок надошт. Вай таъкид намуд, ки аъзои Шӯро бояд дар ин масъала маъмурияти Куриёи Шимолиро қатъан огоҳ намоянд.