ШИРКАТИ «АСЕЛ АРМАН» ДАСТГИРИ ТОҶИКИСТОН

                      Душанбе, 21 май. (АМИТ «Ховар», Лаззат Диловарзод).- Ширкати «Асел Арман» яке аз ширкатҳои калонтарини вилояти Костанайи Ҷумҳурии Қазоқистон аст, ки дорои 40 ҳазор гектар замин мебошад. Раиси кулли ин ширкат Мирзоазиз Усмонов тоҷики муқими Қазоқистон аст, ки дар соҳаи кишоварзӣ фаъолият мебарад. Дар ин ширкат 1300 нафар ба кор фаро гирифта шудааст, ки 150 нафарашон шаҳрвандони Тоҷикистон мебошанд. Ширкати мазкур дар шаҳри Кокчетав корхонаи ордбарорӣ дорад, ки дар як шабонарӯз 120 тонна орд истеҳсол мекунад. Ҳамчунин то 90 фоизи ҳосилро дар шакли гандум ё орд ба Тоҷикистон мефиристад.                      Дар ин бора рӯзноманигори тоҷики муқими Қазоқистон Саломиддин Мирзораҳматов иброз доштааст, ки тоҷирону соҳибкорони тоҷик имконияти калон доранд, ки дар ин ҷо дар соҳаи кишоварзӣ кор карда, ҳам ба худ, ҳам барои Қазоқистону Тоҷикистон фоида овард метавонанд.                      Муовини вазири кишоварзии Қазоқистон Армон Евниев ба хабарнигорон иброз доштааст, ки Ҷумҳурии Қазоқистон ҷиҳати баҳрабардорӣ ба сармоягузорони хориҷӣ 3,5 млн. гектар заминро барои истифодаи муваққатӣ ба мӯҳлати 15- 20 сол супориданист. Дар сурати муваффақ шудан ин мӯҳлат тамдид мегардад.