ТАҚДИМИ МУКОФОТҲОИ ДАВЛАТӢ БА МАРЗБОНОН

                         27 май, — (АМИТ «Ховар»). — Имрӯз Президенти Ҷумҳурии Тоҷикистон Эмомалӣ Раҳмон дар арафаи ҷашни 15 — солагии таъсисёбии Қӯшунҳои сарҳадии Кумитаи давлатии амнияти миллии мамлакат ба як гурӯҳ афсарону сарбозони ин навъи Қувваҳои Мусаллаҳ мукофотҳои давлатӣ тақдим намуд.                       Бо фармони Президенти Ҷумҳурии Тоҷикистон 26 нафар афсарону сарбозони марзбон, ки дар адои қарзи фарзандӣ дар назди халқу Ватан хизматҳои арзанда кардаанд, бо мукофотҳои давлатӣ сарфароз гаштанд.                        Аз ҷумла ду нафар афсарони баландпоя — Саймудин Мирзоев ва Ҳикматулло Пираков ба гирифтани ордени Спитамен дараҷаи 2 мушарраф шуданд.                        Афсарону сарбозони дигар бо медалҳои Ҷасорат ва Марзбони шуҷои Тоҷикистон сарфароз гаштанд. Аз онҳо Шӯҳрат Абдуллоев, Бахтиёр Худоёров ва Абдураҳим Намозов сарбозони қаторӣ мебошанд, ки дар сарҳади давлатӣ қочоқчиёни хатарнокро дастгиру безарар намуда, аз онҳо ҳаҷми зиёди маводи мухаддирро ошкору мусодира кардаанд.                     Ба се нафар марзбононе, ки ҳангоми ҳифзи сарҳади давлатӣ шарафмандона ҳалок гаштаанд, мукофоти давлатӣ баъд аз марг муқаррар шудааст ва он ба волидону пайвандонашон супурда мешавад.                     Президенти Ҷумҳурии Тоҷикистон Эмомалӣ Раҳмон нафарони бо мукофотҳои давлатӣ мушаррафгаштаро бори дигар бо ин сарафрозӣ ва бо 15 — солагии таъсисёбии  Қӯшунҳои сарҳадӣ табрику таҳният гуфта, онҳоро ба хизмати садоқатмандона баҳри ҳифзи марзу буми Ватан, манфиатҳои давлату миллат ва таъмини амнияту суботи кишвар ҳидоят намуд.                    Дар ин бора ба АМИТ «Ховар» аз Хадамоти матбуоти Ҷумҳурии Тоҷикистон иттилоъ доданд.