ТАЪЛИМОТИ ИМОМИ АЪЗАМ

                       Душанбе, 20 май (АМИТ «Ховар», Лутфия Эшонқулова).- «Масоили таҳкими ваҳдату ҳамзистӣ дар таълимоти Имоми Аъзам»- таҳти чунин унвон дар Кумитаи ҳолатҳои фавкулодда ва мудофиаи граждании назди Ҳукумати ҶТ (КҲФ ва МГ) 21 май, конфронси илмӣ баргузор мегардад. Дар он намояндагони Кумитаи ҷавонон, варзиш ва сайёҳии назди Ҳукумати ҶТ, Китобхонаи миллии ба номи А. Фирдавсӣ, Донишкадаи исломии Тоҷикистон ба номи Имоми Аъзам ва кормандони раёсати корҳои тарбиявии КҲФ ва МГ иштирок менамоянд. Тавре ба мухбири АМИТ «Ховар» хабар доданд, аз рӯи барномаи тарҳрезишуда, пеш аз оғози конфронс намоиши китобҳо бо номи «Сарчашмаҳо доир ба зиндагинома ва осори Имоми Аъзам» муаррифӣ гардида, конфронсро Раиси Китобхонаи миллӣ Шариф Тошев ифтитоҳ мебахшад. Дар он иштирокчиён дар бораи усулу асосҳои мазҳаби Абуханифа Имоми Аъзам, аҳамияти ақида ва афкори Имоми Аъзам дар таҳкими ваҳдати миллӣ, ситоиши дӯстию бародарӣ ва ваҳтату ягонагӣ дар афкори ӯ ва нақши осори Абуҳанифа Нӯъмон дар ташаккули ахлоқии ҷавонон гузориш хоҳанд дод.