ЗАРАРИ ОФАТИ ТАБИӢ ДАР ТЕМУРМАЛИК

                     Темурмалик, 18 май. (АМИТ «Ховар», Сулаймон Холов).-Бар асоси иттилои сардори ситоди ҳолатҳои фавқулодда ва мудофиаи граждании ноҳияи Темурмалик Неъмат Ҷалматов дар ноҳия дар натиҷаи боришоти пай дар пай якчанд иншоотҳои соҳилмустаҳкамкунӣ ва ёрирасон, инчунин хонаҳои истиқоматӣ зарари ҷиддӣ диданд. Ба гуфти Н.Ҷалматов 1200 метр иншоотҳои соҳилмустаҳкамкунӣ дар ҷамоатҳои шаҳраки Совет, Танобчӣ, Ҷайралӣ, Қарақамиш, Бобо Юнус хароб гардида, маблағи зарар 1 млн. 150 ҳазор сомониро дар бар мегирад. Инчунин ба 50 иншоотҳои ёрирасон ва участкаҳои наздиҳавлигии хонаҳои истиқоматӣ зарари ҷиддӣ расидааст. Ҳукумат ва идораи суғуртаи давлатии ноҳия барои ёрӣ расонидан ба хоҷагиҳои зарардида чораҳои зарурӣ андешида истодаанд. Талафоти ҷонӣ ба қайд гирифта нашудааст.