ТАРМИМИ МАҚБАРАИ АБДУЛЛОИ ВАЛӢ ОҒОЗ ЁФТ

                   Душанбе, 5 август. (АМИТ «Ховар», Лутфия Эшонқулова). — Вазорати фарҳанги Ҷумҳурии Тоҷикистон ба бўҳрони молиявии умумиҷаҳонӣ нигоҳ накарда, бо дастгирии Ҳукумати Ҷумҳурии Тоҷикистон ҷиҳати ҳифзу нигаҳдошт ва эҳёи мероси ниёгон чораҳои зарурӣ меандешад.                    Тавре ба мухбири АМИТ «Ховар» дар маркази матбуоти вазорат хабар доданд, мутахассисони Вазорати фарҳанг ба тармими яке аз ёдгориҳои меъмории дараҷаи ҷумҳуриявидошта-Мақбараи Абдуллои Валӣ дар деҳаи Ревади ноҳияи Айнӣ оғоз намуданд.Ҳоло дар саросари ҷумҳурӣ 9 ёдгории бостонию меъморӣ аз ҷониби Вазорати фарҳанг тавассути маблағҳои буҷавӣ ва грантҳо тармиму барқарор шуда истодаанд. Ин ёдгориҳо на танҳо дар омўзиши таърих, санъату ҳунари гузаштагон ва тарбияи насли наврас дар рўҳияи ҳисси вантандўстию худогоҳӣ, хештаншиносию поси хотири ниёгон, балки ҳамчун объекти туризми байналмилалӣ дар муаррифии таърихи тоҷикон ба ҷаҳони муосир аҳамияти муҳим доранд.                   Аксари ин ёдгориҳо аз ҷиҳати сохт, санъати меъморӣ ва аҳамияти худ дар Осиёи Марказӣ ягона буда, аллакай диққати бисёр сайёҳон ва дўстдорони таърихро ба худ ҷалб кардаанд.                   Ҳамчунин, лозим ба ёдоварист, ки аз аввали соли ҷорӣ аз ҷониби Иттиҳодияи илмӣ-истеҳсолӣ оид ба муҳофизат ва тармиму истифодаи ёдгориҳои таърихию фарҳангии вазорати мазкур Мақбараҳои Абдуллои Валӣ (Айнӣ), Абдулқодири Челонӣ ( Истаравшан), Қалъаи Ҳулбук ( Восеъ), Имом Зайналобиддин (Ҷиликўл), Хоҷаи Зарринӣ ( Данғара), Хоҷа Аҳмади Бузург (Панҷакент), эҳёи девори Ҳулбук ( Восеъ), эҳёи қалъаи Вомар (Рўшон), тармими Мадрасаи Хоҷа Машҳад бо маблағи умумии 608, 1 ҳазор сомонӣ барқарор шуда истодаанд.