МУСУЛМОНОНИ ЧИН ПАЙРАВОНИ МАЗҲАБИ ИМОМИ АЪЗАМАНД?

                 Душанбе, 22 октябр. (АМИТ «Ховар», Наргис Бояхмедова). – Дар шумораи навбатии маҷаллаи «The Studies of Islamic Culture», нашри Пекин, мақолаи тадқиқотии Директори пажӯҳишгоҳи Дунганшиносии Донишгоҳи марказии миллатҳои Чин профессор Ху Чженхуа «1310 — солагии зодрӯзи Имоми Аъзам Абуҳанифа» чоп шуд. Дар ин бора ба АМИТ «Ховар» аз Сафорати Ҷумҳурии Тоҷикистон дар Ҷумҳурии мардумии Чин иттилоъ доданд.                   Дар мақола гуфта мешавад, ки «Дар ҳудуди Чин зиёда аз 20 миллион мусулмонон умр ба сар мебаранд ва кулли онҳо дар масоили фиқҳ, қонунҳои шариат, эътиқод ва ахлоқ пайравони таълимоти Имоми Аъзам мебошад. Сабаби ин равандро профессор Ху Чженхуа дар гузаштагони мусулмонони Чин медонад. Ба ақидаи ин олим гузаштагони мусулмонони Чин намояндагони миллати форс мебошанд, ки аз Осиёи Марказӣ ва Ғарбӣ ба Чин омадаанд. Қаблан олимони Чин намояндагони қавми «Даши» — ро аз миллати араб медонистанд, аммо ба ақидаи Ху Чженхуа калимаи «Даши» дар талаффузи забони қадимии чинӣ ҳамчун «DA-DJEK» «ТAD-JIK» садо медиҳад.                  «Мусулмонони Чин бо миллати тоҷику ва халқҳои Осиёи Марказӣ пайванди зичи таърихӣ доранд, ки ин дар навбати худ барои таҳкими муносибатҳои дӯстонаи кишварҳо мусоидат хоҳад кард», — навиштааст олими Чин Ху Чженхуа.