«РАЪДУ БАРҚ» ДАР ТЕАТРИ ЛОҲУТӢ

                    Душанбе, 24 ноябр. (АМИТ «Ховар», Таҳмина Ғоибназарова). – Дар Театри давлатии драммавии академии ба номи А.Лоҳутӣ намоишномаи драматурги Чин Сао Юй бо номи «Раъду барқ» ба саҳна гузошта мешавад. Ин намоишнома ҳанӯз солҳои 30 – уми асри гузашта аз тарафи театри мазкур таҳия шуда буд, аммо бо сабабҳои сиёсӣ намоиши он қатъ мегардад. Коргардон Хушназар Майбалиев ин драммаи классикиро бо назардошти аҳамияти маънавӣ доштанаш дубора ба саҳна гузошт. Тавре ӯ мегӯяд: «Намоишнома дар бораи нақши бетафовутӣ ба сарнавишти инсон ва тақдири ӯ нақл мекунад».                     Дар маркази намоишнома таърихи сардори шахтаҳои коркарди ангишт, ки танҳо ба ҷамъоварии сармоя ва гирифтани манфиатҳои моддӣ машғул буда, ба сарнавишти инсон, тақдир ва мушкилоти ӯ муносибати бетафовут дорад, ба намоиш гузошта шудааст. Ҳамчунин дар намоишнома дар бораи ишқи ду ҷавоне, ки аз хешу табор будани ҳамдигар бехабаранду якдигарро дӯст медоранд, нақл карда мешавад. Умуман, дар намоишнома бисёр масъалаҳое муҳими иҷтимоии рӯзмарра баррасӣ мешаванд.                   «Аз дидори намоиш лаззати маънавӣ хоҳед гирифт», — қайд кард дар охир Х.Майбалиев.