МАРОСИМИ ШИНОСОӢ БО КИТОБИ ДАРСИИ ЗАБОНИ ТОҶИКӢ ДАР МАСКАВ

                 Маскав, 10 декабр. (АМИТ «Ховар», Наталя Михайлова). — 9 декабр дар Пажӯҳишгоҳи мамлакатҳои Осиё ва Африқои Донишгоҳи давлатии Маскав ба номи Ломоносов маросими шиносоӣ бо китобҳои дарсии забонҳои тоҷикӣ ва озарӣ баргузор гардид. Китобҳои дарсии мазкур барои омӯзиши забонҳои тоҷикию озарӣ дар мактабҳои олии Русия пешбинда шудаанд.                   Мухбири АМИТ «Ховар» хабар медиҳад, ки китобҳои дарсии мазкур бо ташаббуси Фонди байнидавлатии ҳамкории гуманитарии мамлакатҳои ИДМ нашр карда шуданд.                    Дар ҷамъомад ректори Пажӯҳишгоҳи мамлакатҳои Осиё ва Африқо, профессор Михаил Мейер нашри китобҳоро дар ҳаёти мамлакатҳои Иттиҳод воқеаи муҳим номида, ба муаллифон ва ноширони китобҳо миннатдорӣ баён намуд. Сипас мудири иҷроияи Фонди байнидавлатии ҳамкории гуманитарии мамлакатҳои ИДМ Татяна Бубнова изҳор нмуд, ки тарҷумаи асарҳо ба забони мамлакатҳои ИДМ, нашри китобҳои дарсӣ ва адабиёти гуногун яке аз самтҳои асосии фаъолияти фонд мебошад. Қайд карда шуд, ки ояндаи наздик китобҳои дарсии забонҳои арманӣ, қирғизӣ ва туркманӣ чоп карда мешаванд.