КУРСҲОИ ТАЪЛИМӢ БАРОИ АФСАРОНИ ХОРИҶӢ

Душанбе, 18 феврал. (АМИТ «Ховар», Наргис Бойаҳмедова). —  Аз 17 феврал барои 39 афсари полиси Афғонистон дар ш.Душанбе курсҳои омӯзишӣ кушода шуд. Дарсҳои омӯзишӣ бо ташаббуси Идораи САҲА дар Тоҷикистон, Вазорати корҳои дохилии Ҷумҳурии Тоҷикистон ва Агентии назорати маводи нашъадори назди Президенти Ҷумҳурии Тоҷикистон гузаронида мешаванд. Тавре ба мухбири АМИТ «Ховар» аз  Идораи САҲА дар Тоҷикистон хабар доданд, дарсҳои таълимии мазкур аз ҷониби Шӯъбаи Котибот ва Идораи САҲА дар Тоҷикистон оид ба масъалаҳои фаъолияти полис таҳия шуданд. Дар давоми дарсҳои якмоҳа диққати асосӣ ба машқҳои амалии банақшагирӣ ва ташкили амалиёти ҷустуҷӯи маводи нашъадор, равона карда хоҳад шуд. Афсарони афғон бо ҷараёни оғози парвандаҳои ҷиноӣ, рафти тафтишот ва пешниҳод кардани парвандаҳои ҷиноӣ ба ҳокимияти судӣ шинос мешаванд.