«ТЕЛЕФОНИ МУСТАҚИМ» БАРОИ СОҲИБКОРОН

Душанбе,  22  феврал. (АМИТ «Ховар»,  Бекназари   Абӯбакр). —  Кумитаи  давлатии   сармоягузорӣ  ва  идораи  моликияти  давлати  Ҷумҳурии  Тоҷикистон  ҳамроҳи   намояндагии  Корпоратсияи  байналмилалии  молиявӣ  ва Ҷамъияти  саҳҳомии  «Вавилон» барои   соҳибкорон  ва  тоҷирони  мамлакат  Маркази  машваратӣ  кушод.  Соҳибкорону тоҷирон  ба  воситаи  телефони  боварӣ  аз  маркази  мазкур   дар  бораи  гузаронидани тафтишҳо  ва манъ  кардани  онҳо  маълумоти  зарурӣ  гирифта  метавонанд. Рақами  телефони  боварии  марказ  +44 6202525  мебошад. Телефони  мустақим   имкон  медиҳад, ки   дониши  ҳуқуқии   соҳибкорону тоҷирон  васеътар  гардонда,  ба онҳо   дар  бораи   амалӣ  сохтани  қонунҳо «Дар  бораи тафтиши  фаъолияти  корхонаю  муассисаҳо  дар  Ҷумҳурии  Тоҷикистон» ва «Дар  бораи боздоштани  тамоми  навъҳои  тафтиши  корхонаҳои  хурду  миёна»  маълумоти  зарурӣ  дода  шавад. Муовини раиси  Кумитаи  давлатии   сармоягузорӣ  ва идораи  амволи давлатӣ  Шӯҳрат  Раҳматбоев ба  мухбири  АМИТ «Ховар»  гуфт, ки   ташкили  алоқаи  мустақими  телефонӣ  ҷузъи муҳими  низоми  ислоҳоти  тафтиш  дар  ҷумҳурӣ  буда,  ба  пешрафти  фаъолияти  соҳибкорон  кӯмаки  калон  мерасонад.  Ш. Раҳматбоев  барои ташкили   алоқаи  мустақими  телефонӣ  ба  Корпоратсияи  байналмилалии  молиявӣ  ва  Ҷамъияти  саҳҳомии «Вавилон» изҳори  сипос  намуд. Роҳбари  намояндагии  Корпоратсияи  байналмилаии  молиявӣ  дар  Тоҷикистон  Венди  Вернер  изҳор  намуд, ки  корпоратсия  дар  давоми  5  соли охир   ба  Ҳукумати Тоҷикистон  барои  такмили  низоми   тафтиши  фаъолияти  корхонаҳо  кӯмак  мерасонад. Бинобар  ин  мо  ташаббуси Кумитаи  давлатии  сармоягузориро   дастгирӣ  намудем. Боварӣ  дорем, ки  ин  иқдом  ба  Ҳукумати  мамлакат  барои беҳтар  сохтани  низоми  тафтиш  мусоидат  хоҳад  кард,  гуфт В.Вернер.