КАФОЛАТПУЛӢ 1000 РУБЛ

Душанбе, 1 март. (АМИТ «Ховар», Лаззат Диловазод).- Бино ба маълумоти расмии омории Хадамоти кор бо мӯҳоҷирати ФР дар моҳи январи соли ҷорӣ 86 нафар ва дар соли 2009 4 ҳазору 200 нафар шаҳрвандони Тоҷикистон аз ФР «депортатсия» шудаанд. Бино  ба гуфти ҷонишини сардори хадамоти кор бо муҳоҷирони ФР Константин Полторанин, дар Русия Думаи давлатӣ  лоиҳаи қонунро дар бораи шаҳрвандони хориҷӣ, ки дар сектори хусусӣ ба фаъолият машғуланд, дастгирӣ намуд. Тибқи лоиҳаи қонуни нав шаҳрвандони хориҷӣ бо гирифтани «патент» -и ҳармоҳа, ки 1000 рубл аст, бемалол метавонанд ба таври инфиродӣ ошкоро ба кор         машғул шаванд. Ин механизми оддиест, ки барои шаҳрвандони хориҷӣ дар қонуни нави муҳоҷират ворид шудааст. Бо супоридани боҷи ҳармоҳаи давлатӣ, муҳоҷирони меҳнатӣ 2 сол ҷои зист ва корашонро тамдид карда метавонанд. Айни замон аз рӯи маълумоти Хадамоти муҳоҷирати ФР аз 400 то 600 ҳазор шаҳрвандони тоҷик дар корхонаҳои хусусӣ  машғули коранд.