СУДЯ «АВФ» — РО ХАРИДУ ХУДРО ЗИНДОНӢ КАРД

Душанбе, 3 март. (АМИТ «Ховар», Лаззат Диловарзод).- Шаҳрванд «Д», ки истиқоматкунандаи шаҳри Қайроққуми вилояти Суғд мебошад, бо аризаи даъвогӣ ба Раёсати  Агентии НДМ ва мубориза бо коррупсияи ин вилоят муроҷиат намуд, ки судя Ашур Рӯзиев барои озод намудани хешаш, ки тибқи қонун «Дар бораи авф» бояд озод мешуд, 1000 доллари амрикоӣ «хизматона» — ришва талаб дорад. Барои санҷиши ариза гурӯҳи фаврӣ- тафтишотӣ ташкил ёфт ва 18 – уми феврали соли 2010 ба идораи суди шаҳри Қайроққум расида лаҳзаи қабули ришвагириро  интизор гардиданд. Худи ҳамон рӯз ҳангоми амалӣ шудани нияти нопок, Ашур Рӯзиев дастгир шуд. Акнун парвандаи ҷиноятии судяро дар Раёсати Агентии НДМ ва мубориза бо коррупсияи вилояти Суғд бо моддаи 319 (гирифтани пора) –и КҶҶТ барои аз 5 то 7 сол ба «дорулахлоқ» фиристонидани Ашур Рӯзиев  риштабандӣ мекунанд.