ДИПЛОМАТИ САУДӢ ДАР ХУҶАНД

Душанбе, 1 апрел. (АМИТ «Ховар», Бекназари Абӯбакр). –Масоили ба роҳмонии ҳамкории судманди тарафайн дар мавриди рушди иқтисодию иҷтимоӣ ва фарҳангӣ, аз ҷумла бунёди корхонаҳои муштарак ва истифодаи самараноки имкониятҳои мавҷуда 1 апрел, зимни мулоқоти раиси шаҳри Хуҷанд Содиқҷон Мирхолиқов ва Кордори Сафорати Шоҳигарии Арабистони Саудӣ дар Ҷумҳурии Тоҷикистон Абдулраҳмон ибни Саид ал-Ҷумъа баррасӣ гардид. С. Мирхолиқов оид ба шаҳри Хуҷанд, ки дар радифи шаҳрҳои қадимтарини дунё яке аз шаҳрҳои соҳибтаъриху соҳибтамаддун маҳсуб мешавад ва имрӯз низ дар даврони истоқлол ҳамаи соҳаҳои иқтисодиву иҷтимоӣ ва фарҳангиаш бо суръат ривоҷ меёбанд, иттилоъ дод. Дар навбати худ Абдулраҳмон ибни Саид ал-Ҷумъа ҳусни таваҷҷӯҳи кишварашро ба  Ҷумҳурии Тоҷикистон ва аз ҷумла маркази маъмурии вилояти Суғд – шаҳри Хуҷанд иброз дошт. Дар дастгоҳи раиси шаҳри Хуҷанд ба мухбири АМИТ «Ховар» иттилоъ доданд, ки нимаи дуюми рӯз Кордори Сафорати Шоҳигарии Арабистони Саудӣ аз осорхонаи таърихӣ,  маҷмааи таърихии «Шайх Маслиҳатдин» ва бозори «Панҷшанбе», ҳамчунин аз Қасри фарҳанги Арбоби хоҷагии ба номи Урунхоҷаеви ноҳияи Бобоҷон Ғафуров дидан мекунад.