ОҒОЗИ АМАЛИЁТИ «КӮКНОР-2010» ДАР ҶУМҲУРӢ

Душанбе, 30 апрел ( АМИТ «Ховар». Фирдавс Таваров) — Бо мақсади ташкили муборизаи муштараки вазорату идораҳои  дахлдори Ҷумҳурии Тоҷикистон ва мақомоти иҷроияи маҳаллии ҳокимияти давлатӣ, ҷиҳати ошкору набуд сохтани растаниҳои нашъаовари худрӯй ва ғайриқонунӣ дар қаламрави Ҷумҳурии Тоҷикистон ҳар сол аз аввали баҳор то охири тирамоҳ амалиёти «Кӯкнор» гузаронида мешавад, ки он давра ба давра доир мешавад. Имрӯз дар Агентии назорати маводи нашъаовари назди Президенти Ҷумҳурии Тоҷикистон аввалин ҷаласаи Ситоди кории амалиёти мазкур баргузор гардид, ки дар он намояндагони вазорату идораҳои зидахл ширкат варзиданд. Қарор шуд, ки дар ҷараёни баргузории амалиёти «Кӯкнор-2010»  ҳар ду моҳ ҷаласаи Ситоди корӣ гузаронида шавад. Аммо дар ҳоли ба миён омадани зарурат Ситод метавонад ҷаласаҳои сайёри худро дар вилоятҳо ва ё минтақаҳое, ки вазъи нашъамандӣ мураккаб арзёбӣ мешавад, баргузор кунад. Дар ин бора ба АМИТ «Ховар» аз маркази матбуоти Агентии назорати маводи нашъаовар назди Президенти Ҷумҳурии Тоҷикистон хабар доданд. Маврид ба ёдоварист, ки соли гузашта дар натиҷаи амалиёти  «Кӯкнор», ки аз 1 май то 30 ноябр баргузор шуда буд, мақомоти ҳифзи ҳуқуқ, ва сохторҳои қудратии ҷумҳурӣ аз муомилоти ғайриқонунӣ бештар аз 2 тоннаву 385 кило воситаҳои нашъаовар мусодира намуданд, ки зиёда аз 787 килои онро героин ташкил медод.Дар ин давра аз муомилоти ғайриқонунӣ худудан 532 кило афюн ва беш аз 1 тоннаву 165 кило мухаддироти гурӯҳи каннабис забт гардид. Фаъол гардидани чораҳои фаврӣ-ҷустуҷӯӣ ба ошкор кардани 93 ҳодисаи нашъунамо ва нобудсозии бангдонаи худрӯй дар майдони умумии 18,4 га замин мусоидат кард.