ШАҲРВАНДИ ҶУМҲУРИИ ҚИРҒИЗИСТОН ДАСТГИР НАШУДААСТ?

Душанбе, 13 апрел. (АМИТ «Ховар», Бекназари Абӯбакр). – «Шаҳрванди Ҷумҳурии Қирғизистон Неъматулло Ботақозиев дастгир нашудааст, бинобар сабаби надоштани ҳуҷҷатҳои тасдиқкунандаи шахсияташ, на дар боздоштгоҳи Кумитаи давлатии амнияти миллӣ, балки мутобиқи қонунгузории Ҷумҳурии Тоҷикистон дар муассисаи нигаҳдории муваққатии Раёсати корҳои дохила нигаҳ дошта шудааст», — гуфт прокурори генералии Ҷумҳурии Тоҷикистон Шерхон Салимзода 13 апрел, зимни нишасти матбуотӣ дар шаҳри Душанбе. Ӯ тазаккур дод, ки аз Прокуратураи генералии Қирғизистон ба унвони Прокуратураи генералии Тоҷикистон номаи дархостӣ барои бозпас гардондани Н. Бутақозиев расидааст, ки тибқи он ин шахс дар қаламрави Қирғизистон ҷиноят содир кардааст. Прокуратураи генералии Тоҷикистон айни ҳол  ин номаро маврид омӯзиш қарор дода истодааст. «Агар ҷиноятҳои содиркардаи Н. Бутақозиев характери сиёсӣ надошта бошад ва ҷиноятҳои умумӣ бошад, албатта пас гардонда мешавад. Аммо агар характери сиёсӣ дошта бошад ва ӯ паноҳгоҳи сиёсӣ талаб карданӣ бошад, мутобиқи қонунгузории Тоҷикистон қарор қабул карда хоҳад шуд», — идома дод Ш. Салимзода. Мавриди ёдоварист, ки қаблан баъзе расонаҳои хабарӣ итилоъ дода буданд, ки Н. Бутақозиев ҷиҳати гирифтани паноҳгоҳи сиёсӣ ба Тоҷикистон омада буд ва гуфта мешуд, ки вай охири моҳи марти соли ҷорӣ аз сӯи кормандони ниҳодҳои интизомӣ боздошт шуда, дар СИЗО –и Кумитаи давлатии амнияти миллӣ нигаҳдорӣ мешавад. Вале ин иттилоотро прокурори генералии Тоҷикистон куллан рад кард.