МАРКАЗИ МИЛЛИИ ПАТЕНТУ ИТТИЛООТ

Душанбе, 28 май. (АМИТ «Ховар», Лаззат Диловарзод).- Дар Вазорати рушди иқтисод ва савдо ба мухбири АМИТ «Ховар» иттилоъ доданд, ки Маркази миллии патенту иттилооти вазорати мазкур 17- сола шуд. Дар давоми 17 соли мавҷудият ба номи он 972 арзнома ба ихтироъ барои гирифтани патент, 452 арзнома барои дастрасии  нахустпатент ба ихтироъ, 136 арзнома барои дарёфти патент ба намунаи саноатӣ, зиёда аз 41 ҳазору 800 арзнома барои тамғаи молӣ ворид гардидааст. Ҳамаи арзномаҳо аз санҷиши дақиқи давлатӣ гузашта, ба соҳибонашон 472 патент барои ихтироъ, 320 нахустпатент ба ихтиро, 50 патент ба намунаи саноатӣ  ва 8 ҳазору 714 шаҳодатнома ба тамғаи молӣ дода шудааст. Мувофиқи синфбандии патентии байналмилалӣ, зиёда аз 50 фоизи ихтироъҳо ба соҳаи тиб, кимиё ва кишоварзӣ тааллуқ доранд ва 90 фоизи арзномаи ба шӯъбаи ихтироъ дохилшуда, арзномаҳои миллӣ мебошанд,- иброз дошт директори Муассисаи давлатии Маркази миллии патенту иттилоот Шарофуддин Наҷмуддинов ба мухбири АМИТ «Ховар».