ПОЙГАИ БАЙНАЛМИЛАЛИИ ДЕСАНТЧИЁН

Душанбе,  12 май. (АМИТ «Ховар», Наталя  Михайлова). —  «Иттифоқи  десантчиёни  Сибир»  ба  ҳамаи  иштирокчиёни  амалиёти  ҷангӣ,  хизматчиёни  ҳарбии  Артиши  десанти  ҳавоӣ, баталёни   десантии  зарбазан, аскарони  пиёданизоми  дарёнавард,  қисмҳои  ҳарбии  таъиноти  махсус  ва  разведкаи  ҳамаи  навъҳои  қувваҳои  мусаллаҳи  Қазоқистон,  Ӯзбекистон, Қирғизистон  ва  Тоҷикистон  муроҷиат  намуда,  онҳоро   даъват  мекунад, ки  дар  пойгаи  байналмилалии  автомобили десантчиён  ширкат  варзанд. Пойга моҳи  июл  аз  шаҳри  Бердски  вилояти  Новосибирск  оғоз  меёбад.  Пойгаи  мазкур  ба  муносибати  100 – солагии  зодрӯзи   фармондеҳи  барҷастаи  Артиши  десанти  ҳавоӣ,  генерали  артиш  Василий Маргелов,  65 – солагии  Ғалаба дар  ҶБВ,  80 – солагии Артиши  десанти  ҳавоӣ  ва  60 —  солагии ташкили  қисмҳои  ҳарбии  таъиноти  махсуси  Раёсати  умумии  разведка, «Иттифоқи  десантчиёни  Сибир»  бо ташаббуси  муовини   раиси  иттифоқи  мазкур  В.Винникова  бо  дастгирии  ҳайати  қумондонии  Артиши  десанти  ҳавоӣ,  Иттифоқи  байналмилалии  десантчиён  ва  Иттифоқи  десантчиёни  Русия  гузаронида  мешавад. Дар  пойга тақрибан  10  мошин  аскарону  афсарон  ширкат  меварзанд.  Онҳо  роҳи  мошингарди  Русия – Қазоқистон — Ӯзбекистон  ва  Қирғизистонро  дар  давоми  2,5  ҳафта  тай  хоҳанд  кард.  Дар  шаҳру  ноҳияҳои  қад – қади  роҳ  бо   иштирокчиёни  ҶБВ,  ветеранҳои  ҷанг,  хизматчиёни  ҳарбии  Артиши  десанти  ҳавоӣ мулоқотҳо ташкил  намуда,  барномаҳои  фарҳангӣ  амалӣ  карда  мешаванд. Инчунин  барномаи  сафар  гузаронидани   нишастҳои  матбуотиро  бо  намояндагони  сафоратхонаҳо, мақомоти  маҳаллӣ  ва сокинони  маҳалҳои  аҳолинишин  дар бар  мегирад.