ВАЗИР ДАР БАДАХШОН ҚАРОР ДОРАД

Душанбе, 20 май.(АМИТ «Ховар», Марзия Саидова).- Муддати се рӯз аст, ки Вазири маорифи ҷумҳурӣ Абдуҷаббор Раҳмонов бо сафари корӣ дар Вилояти Мухтори  Кӯҳистони Бадахшон қарор дорад. Абдуҷаббор Раҳмонов аз муассисаҳои таълимии ноҳияҳои Дарвоз, Ванҷ, Рӯшон, Ишкошим, Шуғнон ва шаҳри Хоруғ дидан намуда, бо омӯзгорону шогирдони муассисаҳои таълимӣ атрофи мӯҳтавои Паёми Президенти кишвар Эмомалӣ Раҳмон ба Маҷлиси Олии Ҷумҳурии Тоҷикистон, оид ба корҳои ободонӣ ҷиҳати таҷлили ҷашни Ваҳдати миллӣ дар ВМКБ ва баланд бардоштани сифати таълиму тарбия бахусус, омода намудани хатмкунандагони муассисаҳои таҳсилоти умумӣ ба муассисаҳои олӣ ва миёнаи касбӣ сӯҳбату мулоқот доир намуд. Вазири маориф ҳамчунин аз сохтмонҳои ҷашнии муассисаҳои таълимӣ боздид намуда,  ҷиҳати дар мӯҳлати муайяншуда бо сифати баланд супоридани иншооти ҷашнӣ ба масъулин дастуру супоришҳо дод. Сардори маркази матбуоти Вазорати маорифи ҷумҳурӣ Ноилшо Нуралиев ба АМИТ «Ховар» иттилоъ дод, ки Вазири маориф А. Раҳмонов, ҳамзамон  бо Раиси ВМКБ Қодири Қосим ва бо ҳайати устодону донишҷӯёни Донишгоҳи давлатии Хоруғ  ба номи Назаршоев вохӯрӣ намуда, вазъи соҳаи маорифро дар ВМКБ  баррасӣ кард.