МАСОҲАТИ ЗАМИНИ КИШТ ВАСЕЪ МЕШАВАД

Хоруғ,  14 июн. (АМИТ «Ховар», Л.Додо). —  Дар  ҳудуди  ВМКБ  қобили  кишт  гардонидани  қитъаҳои  нави  замин  давом  дорад.  Роҳбари  раёсати   мелиоратсия  ва  захираҳои оби  вилоят  Баҳодур  Сулаймонов  зимни  сӯҳбат  бо мухбири  АМИТ «Ховар»  гуфт, ки  Ҳукумати  ҷумҳурӣ  бо  мақсади   қобили  кишт  гардонидани  қитъаҳои нави   замин  дар  мавзеи Бовиди   ноҳияи  Ванҷ  1  миллиону  200  ҳазор  сомонӣ  ҷудо  намуд.  Дар  мавзеи  Дашти  Лучи  ноҳияи  Дарвоз  зиёда  аз  100 гектар  замини  лалмӣ  обӣ  карда  мешавад.  Бо  ин  мақсад  аз буҷети  ҷумҳурӣ  650  ҳазор  сомонӣ  ҷудо  карда  шуд.  Тӯли  солҳои охир  дар  ноҳияи  Ванҷ   бештар  аз  80  гектар  замин  қобили  кишт  гардонида  шуд.  Дар  ноҳияи  Дарвоз  сохтмони  канал  давом  дорад,  то  имрӯз  80  фоизи   корҳои  сохтмони он  ба охир расидааст.