МУЛОҚОТИ Э. РАҲМОН БО ШИ ДАГАН

19 июни соли 2010 Президенти Ҷумҳурии Тоҷикистон Эмомалӣ Раҳмон аз шаҳри Урумчии ноҳияи Синсзян — Уйғури Ҷумҳурии Мардумии Чин ба шаҳри Қошғари ҳамин ноҳия сафар кард. Дар фурўдгоҳи Қошғар Сарвари давлати Тоҷикистон Эмомалӣ Раҳмонро бо шукўҳу шаҳомати хоссаи шарқиёна ва самимияти дўстона истиқбол гирифтанд. Бояд хотиррасон намуд, ки сарҳади миёни Тоҷикистону Чин аз байни ҳамин шаҳр ва Вилояти Мухтори Кўҳистони Бадахшон мегузарад ва гузаргоҳи сарҳадии Кулма — Қаросу низ дар ҳамин ҷо аст. Аксари тоҷикони Чин, ки шумораи умумиашон беш аз 50 ҳазор нафарро ташкил медиҳад, дар мавзеи Тошқурғони ҳамин минтақа зиндагӣ мекунанд. Сарвари давлат Эмомалӣ Раҳмон бо Муовини котиби якуми хизб -роҳбари округи Қошғар Ши Даган мулоқот намуда, масоили таҳким ва густариши робитаҳои Тоҷикистонро бо ин шаҳр ва аз тариқи он бо ҷумҳурии Мардумии Чин дар маҷмўъ баррасӣ намуд. Бо қаноатмандӣ зикр гардид, ки шаҳри Қошғар минтақаи озоди иқтисодӣ эълон гаштааст ва барои тараққиёту пешрафти иҷтимоию иқтисодии он ва ҳамаи ҳудуди ноҳияи Мухтори Синсзян – Уйғур аз ҷониби ҳукумати марказии Чин корҳои намоён ба назар мерасанд. Зимни сўҳбати пурмўҳтаво ҳарду ҷониб омодагӣ ва ҳавасмандии худро ба густариши ҳамкории байниминтақавӣ таъкид намуданд. Ду ҷониб изҳор доштанд, ки баҳри таъмини кори доимии гузаргоҳи сарҳадии Кулма – Қаросў дар ҳамаи фаслҳои сол ва вусъат додани кори ин шохаи Шохрохи бузурги Абрешим кўшиш ба харҷ медиҳанд. Айни ҳол ин гузаргоҳ дар 4 моҳи фасли сармои ин минтақаи баландкўҳ баста аст. Ба пайваста ба роҳ мондани намоишгоҳҳои молу маҳсулоти Тоҷикистону қошғар дар ҳудуди ҳамдигар ки солҳои охир ба назар мерасад изҳори ҳавасмандӣ карда шуд Дар шаҳри Қошғар Президенти мамлакат Эмомалӣ Раҳмон ҳамчунин дар форуми соҳибкорону тоҷирони   Тоҷикистон ва ин минтақаи Чин иштирок намуда, онҳоро ба ҳамкории наздик, ба роҳ мондани робитаҳои мустақим ва истифода аз имкону захираҳои фаровони муштарак ташвиқ кард. Дар ин бора ба АМИТ «Ховар» аз Хадамоти матбуоти Президенти Ҷумҳурии Тоҷикистон иттилоъ доданд.