ОМОДАСОЗИИ МУТАХАССИСОН ДАР АСОСИ ҚАРОРДОД

Душанбе, 25 июн. (АМИТ «Ховар», Лаззат Диловарзод).- Дар Донишгоҳи давлатии тиббии Тоҷикистон ба номи Абӯалӣ ибни Сино омодасозии мутахассисон аз ҷумлаи шаҳрвандони Тоҷикистон, инчунин аз тариқи шартномаи дутарафа бо корхонаҳо, ташкилот, муассисаҳо, ҳукуматҳои маҳаллӣ ва воҳидҳои сохтории дахлдори онҳо дар асоси қарордод (пулакӣ) низ сурат мегирад. Пардохти музди яксолаи таҳсил барои гурӯҳҳои шартномавии факултаи тиббӣ — 900 доллар, стоматологӣ — 1000, фарматсевтӣ — 700 ва нигоҳдории тандурустии ҷамъиятӣ 550 доллари амрикоӣ (бо асъори миллӣ ва курси бонки миллӣ)- ро ташкил медиҳад. Бино ба маълумоти ректорати донишгоҳи мазкур, шаҳрвандони давлатхои хориҷӣ, инчунин хориҷиёну шахсони бетабааи муқими Ҷумҳурии Тоҷикистон ба ДДТТ ба номи Абӯалӣ ибни Сино тибқи шартномаву созишномаҳои байнидавлатӣ фақат аз тариқи шартномавӣ дар сурати доштани ҳуҷҷати баробарэътирофи таҳсилот ва супоридани имтиҳоноти дохилшавӣ ва пардохти музди таълим қабул карда мешаванд.