ТАҒЙИРОТ БА ҚОНУНИ БАҚАЙДГИРИИ ДАВЛАТИИ ДАКТИЛОСКОПӢ

Душанбе, 21 июн.(АМИТ «Ховар», Марзия Саидова).- Лоиҳаи Қонунҳои конститутсионии Ҷумҳурии Тоҷикистон «Оид ба ворид намудани  тағйиру иловаҳо  ба Қонунҳои конститутсионии Ҷумҳурии Тоҷикистон «Дар бораи Маҷлиси Олии Ҷумҳурии Тоҷикистон», «Дар бораи вазъи ҳуқуқии узви Маҷлиси миллӣ  ва вакили Маҷлиси намояндагони Маҷлиси Олии Ҷумҳурии Тоҷикистон» 21 июн дар ҷаласаи Шӯрои Маҷлиси намояндагон, ки таҳти раёсати Раиси палатаи поёнии парлумони мамлакат Шукурҷон Зуҳуров доир шуд, баррасӣ гардиданд. Аъзои Шӯро, инчунин лоиҳаи Қонунҳои Ҷумҳурии Тоҷикистон «Дар бораи маърифат ва тарбияи экологии аҳолӣ», «Дар бораи иммунопрофилактикаи бемориҳои сироятӣ», «Дар бораи бехатарии иншоотҳои гидротехникӣ», «Дар бораи баҳисобгирии муҳосибӣ  ва ҳисоботи молиявӣ», «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи амният», «Дар бораи бақайдгирии давлатии дактилоскопӣ», «Дар бораи китобдорӣ»-ро  муҳокима карданд. Назар ба итттилои сардори маркази матбуоти Маҷлиси намояндагон Муҳаммадато Султонов, масъалаҳои зикршударо вакилони палатаи поёнии парлумони мамлакат Шодӣ Шабдолов ва Исмоил Талбаков шарҳ дода, афзалияти онҳоро дар рушди ҷомеаи Тоҷикистон баён карданд.