А. ХОЛИҚОВ: «ДИНРО ҲАМЧУН НИҚОБ ИСТИФОДА НАБАРЕМ»

Душанбе, 9 июл. (АМИТ «Ховар», Лутфия Эшонқулова).-Минбаъд руҳониёне, ки дар масҷидҳо аз минбарҳои баланд амри маъруф карданианд, бояд ҳатман аз санҷиши Кумитаи оид ба корҳои дини назди Ҳукумати Ҷумҳурии Тоҷикистон гузаранд. Дар ин бора имрӯз 9 июл зимни  ҷаласаи нахустини ҳайати мушовараи Кумитаи мазкур раиси  он Абдураҳим Ҳолиқов  ба рӯзноманигорон хабар дод. Ӯ қайд намуд, ки вақтҳои охир дар масҷидҳо аз ҷониби баъзе ходимони дин,  сабти садо ва адабиёти гуногуни таблиғотӣ тайёр карда ва дар байни мардум паҳн карда мешаванд, ки ин бар зарари ҷомеа мебошад. Ҳол он, ки мувофиқи қонун барои чопи адабиёт, баровардани қартаҳо ва суханронӣ дар байни издиҳом бояд иҷозати махсуси Кумитаи оид ба корҳои дини назди Ҳукумати ҷумҳурӣ гирифта шавад.