БАРОИ ХУДКУШИИ ЗАН ШАВҲАР ҶАВОБГАР АСТ

Хуҷанд, 16  июл. (АМИТ «Ховар», Санавбар  Мақсудова). —  Коллегияи  судии  вилояти  Суғд  қарори  суди ноҳиявии  ноҳияи  Шаҳристонро  нисбат ба  сокини ин  ноҳия  Робит  Ҷумъаев, ки дар  қатли  ҳамсараш  Саида  Ҷумъаева  гунаҳгор  дониста  мешавад,  бетағйир  гузошт. Баъди  аз  муҳоҷират  баргаштани  Робит  Ҷумъаев  дар  моҳи  декабри  соли  2008 аз  Федератсияи  Русия  дар  оилаашон  ҷангу  хархаша  рух дод, ки   сабабгори он  гӯё  хиёнати  занаш  бошад. Пас  аз  зарбу  лати   чандинкарата, таҳқир  ва фишори  пайвастаи  шавҳар  Саида  Ҷумъаеваи  марҳум  ду  карат   кӯшиши  худкушӣ  намуд.  Бори  аввал  17  декабри  соли  2008 ӯ  хост раги  дастонашро бурад,  рӯзи  дигараш  ҳам  ӯ  кӯшиши  худкушиашро  такрор  намуд. Вале  ин  кӯшиш  бенатиҷа  анҷом  ёфт. Барои  ҳифзи  худ  аз  таҳқиру  тӯҳмат  ва  зӯрию  фишор Саида  Ҷумъаева   роҳи  дигар наёфта,  8  апрели  соли 2009  дар  анбори  хона  худашро овехт. Аз  рӯи  факти  мазкур  парвандаи  ҷиноятӣ  кушода  шуд. Суди  ноҳияи  Шаҳристон  ҳама  ҳолатҳои  ин  фоҷиаро  ба  ҳисоб  гирифта,  мувофиқи  моддаи  109,  қисми  2  Кодекси  ҷиноятии  Ҷумҳурии  Тоҷикистон Робит  Ҷумъаевро  ба  5  соли маҳрумият аз  озодӣ  дар  муассисаи  низомаш   пурзӯр  маҳкум  намуд.  Вале баъдтар  пас  аз   баромадани  Қонуни  авф  сеяки ҳукми  Робит  Ҷумъаев  кам  карда шуд. Дар  ин  миён  коллегияи  судии  вилояти  Суғд  ҳукми  суди  ноҳиявии  ноҳияи  Шаҳристонро  бетағйир  гузошт. Тибқи  иттилои  раёсати  адлияи  вилоят  дар  нимсолаи  аввали  соли  2010  дар  шимоли  мамлакат  6  парвандаи  ҷиноятӣ  бо  гуноҳи то ба  худкушӣ  расонидан  кушода  шудааст.