ОЛИМОВ ВА КОМИЛОВ БА БРАЗИЛИЯ МЕРАВАНД

Душанбе, 22 июл.(АМИТ «Ховар», Марзия Саидова).-Аз 25 июл  то 3 августи соли 2010 дар пойтахти Бразилия шаҳри Бразилиа Иҷлосияи 34-уми Кумитаи байналмилалии мероси фарҳанги ҷаҳонии ЮНЕСКО баргузор мегардад. Дар иҷлосия Ҷумҳурии Тоҷикистонро директори  Институти шарқшиносӣ ва мероси хаттии Академияи илмҳои ҷумҳурӣ Кароматулло Олимов ва котиби масъули  Комиссияи миллии Ҷумҳурии Тоҷикистон оид ба корҳои ЮНЕСКО Мурод Комилов намояндагӣ  менамоянд. Дар назар аст, ки дар иҷлосия масъалаи ворид кардани ёдгории таърихии Ҷумҳурии Тоҷикистон Саразм ба рӯйхати мероси фарҳанги ҷаҳонӣ баррасӣ мегардад. Дар ин сол 35 кишвари ҷаҳон дар мавриди ба  рӯйхати мероси фарҳангии ҷаҳонӣ дохил кардани ёдгориҳои фарҳангии худ ба Кумитаи байналмилалии мероси фарҳанги ҷаҳонии ЮНЕСКО дархост пешниҳод кардаанд.