ОМОДАГӢ БА ЯРМАРКА-НАМОИШИ «АГРО-ЭКСПО ХУҶАНД-2010»

Суғд, 21 июл.(АМИТ «Ховар», Мирзалӣ Амонов, Самад Юсуфӣ).-Гурӯҳи кории ташкил ва гузаронидани ярмарка-намоиши «Агро-Экспо Хуҷанд-2010» дар шаҳри Хуҷанд ҷамъ омада, масъалаҳои рӯзҳои  баргузории нахустин ярмарка- намоиши кишоварзии «Агро-Экспо Хуҷанд-2010», иштироки меҳмонон аз хориҷи кишвар ва маблағгузории ярмаркаро муҳокима намуданд.             Ярмарка — намоиши кишоварзии «Агро-Экспо Хуҷанд-2010» 27, 28 ва 29-уми августи соли равон дар комплекси фароғатию истироҳатии «Наврӯзгоҳ»-и шаҳри Хуҷанд ба маърази тамошо гузошта мешавад.             Маблағгузории ярмарка-намоиши кишоварзиро ташкилоти байналхалқии ЮСАИД ба ӯҳда дошта, дигар муассисаю ташкилотҳои байналхалқию хизматрасон, аз қабили АСТЕД, Тсеll гузаронидани семинару тренингҳо ва барномаи ҷолиби фароғатиро ба зимма гирифтаанд.