ШӮҲРАТИ ФАКУЛТАИ ЭНЕРГЕТИКИИ ДТТ

Душанбе, 16 июл. (АМИТ «Ховар», Людмила Дубинина) – «Дар соли нави хониш раёсати факултаи Донишгоҳи техникии Тоҷикистон ният доранд, ки 1935 нафарро ба курси аввал ва 70 нафари дигарро барои гирифтани ихтисоси дуюм, ки дар асоси шартнома таҳсил мекунанд, қабул намоянд» — гуфт 14 июл дар нишасти матбуотии ҷамъбасти нимсолаи аввали соли ҷорӣ ректори ДТТ ба номи академик М. Осимӣ Анвар Абдурасулов. Тибқи иттилои декани факултаи технологияҳои иттилоотӣ-коммуникатсионӣ ва котиби комиссияи қабул Сироҷиддин Набиев, айни замон қабули ҳуҷҷатҳо аз рӯи 12 самт ва 54 ихтисос идома дорад. То санаи 13 июл зиёда аз 600 ҳуҷҷати довталабон қабул карда шудааст, ки бештари он ба факултаи энергетикӣ супорида шудааст. Баъдан факултаи «Сохтмон ва меъморӣ» ва «Технологияҳои иттилоотӣ-коммуникатсионӣ  серталабанд. Баръакс ба факултаи «Технологияҳои кимиёвӣ ва металлургия» хеле кам ҳуҷҷат супоридаанд. Ба ин факулта ҳамагӣ 20 ариза ворид шудааст, новобаста аз он ки дар ҷумҳурӣ як қатор корхонаҳои саноатӣ, чун «Тоҷикхимпром», «ТАЛКО» ва дигар корхонаҳо фаъолият дошта, ба мутахассисони баландихтисос ниёз доранд. Дар нишаст зикр гардид, ки дар ҳамбастагӣ ба Созишномаҳои байнидавлатӣ ва байни макотиби олӣ дар ДТТ ҳамчунин қабули довталабон барои дохил шудан ба як қатор макотиби олии Руссия: Академияи техникии Воронеж, Донишгоҳи Федеролии Сибир, Донишгоҳи давлатии Астрахан, Донишкадаи энергетикии Маскав ва Донишкадаи политехникии Харков ба роҳ монда мешавад.