СУДҲО 17255 ПАРВАНДАИ ГРАЖДАНИРО БАРРАСӢ КАРДАНД

Душанбе, 13 июл. (АМИТ «Ховар», Лаззат Диловарзод).- Шӯрои адлияи Ҷумҳурии Тоҷикистон бо иштироки намояндагони васоити ахбори омма нишасти матбуотӣ доир намуд. Раиси Шӯрои адлия Зафар Азизов оид ба натиҷаи ҷамъбасти фаъолияти соҳа дар нимсолаи аввали соли 2010  ба намояндагони ВАО- и ҷумҳурӣ маълумоти муфассал дода, иброз дошт, ки Шӯрои адлия баҳри таъмини мустақилияти судяҳо, интихобу ҷобаҷогузории дурусти кадрҳо, таъмини шароити моддию техникӣ ва баланд бардоштани сатҳи тахассусии судяҳои коромӯз ва кормандони судҳо, таъмини судҳо бо бино, кодексу адабиётҳои ҳуқуқӣ, бо иштироки судяҳои  судҳои ҷумҳурӣ 16 ҷаласаи васеъ ва ҷамъомадҳои махсус гузаронида, дар ин ҷамъомадҳо масоили мухталифи самтҳои гуногуни фаъолияти судиро мавриди муҳокима қарор додааст. Дар давоми нимсолаи якуми соли 2010 ба судҳои ҷумҳурӣ 17 ҳазору 255 адад парвандаҳои гражданӣ ворид гардида, нисбати 8979  парвандаҳо ҳалномаи судӣ бароварда шудааст. Ба истеҳсолоти судӣ дар ин муддат ҳамчунин 4031 парвандаҳои ҷиноятӣ ворид гардида,  нисбат ба 2864 адади он ҳукм бароварда шудааст. Ба судҳои иқтисодӣ бошад, дар давраи ҳисоботӣ 1130 аризаҳои даъвогӣ ворид гардида,  нисбат ба 549 адади он ҳалномаҳои судӣ бароварда шудааст. Дар маҷмӯъ,  судҳои ҷумҳурӣ дар давоми нимсолаи якум 42 ҳазору 674 адад парвандаҳои ҷиноятӣ, гражданӣ, маъмурӣ, иқтисодӣ ва  пешниҳодҳои мақомоти иҷрои ҷазоро баррасӣ намудаанд. Сипас хабарнигорон дар муҳокимаи масъалаҳои баррасигардида фаъолона иштирок намуда, ба саволҳои худ ҷавобҳои қаноатбахш гирифтанд.