БЕҲТАРИН ҲАМШИРАИ ТИБ МУАЙЯН ГАРДИД

Душанбе, 13 август. (АМИТ «Ховар», Бекназари Абӯбакр). — Бахшида ба 1030-солагии зодрӯзи Абӯалӣ ибни Сино ва иди касбии кормандони соҳаи тибби Ҷумҳурии Тоҷикистон дар шаҳри Хуҷанд озмуни вилоятии «Беҳтарин ҳамшираи тиб» ҷамъбаст гардид. Озмун аз се давр – таҷрибаи корӣ, пурсишу посух аз ҳаёт ва фаъолияти Абӯалӣ ибни Сино ва қироати шеър иборат буда, дар он аз 22 муассисаи тиббии шаҳру ноҳияҳои вилоят ҳамшираҳои шафқат  иштирок намуданд. Ҳайати ҳакамон озмуни «Беҳтарин ҳамшираи тиб»-ро натиҷагирӣ намуда, ҷойи аввалро ба ҳамшираи тиб аз Маркази вилоятии таълимии клиникавии тибби оилавӣ Муяссара Одилова сазовор дониста, ӯро бо  тӯҳфа сарфароз гардониданд. Ҷойи дуюм насиби ҳамшираи тиб аз беморхонаи марказии ноҳияи Панҷакент Қурбоной Асадова ва ҷойи сеюм насиби ҳамшираи тиб аз Маркази дилшиносии вилоят Зайнура Мамадҷонова гардида, ҳарду ҳам бо мукофот қадрдонӣ шуданд. Мавриди зикр аст, ки ғолибони  ду ҷойи аввали озмуни вилоятии  «Беҳтарин ҳамшираи тиб» дар озмуни ҷумҳуриявии «Беҳтарин ҳамшираи тибби Ҷумҳурии Тоҷикистон», ки дар шаҳри Душанбе баргузор мегардад,  иштирок хоҳанд кард.