БУНЁДИ РОҲҲО ИДОМА ДОРАД

  Ҷиргатол, 20 август. (АМИТ «Ховар», М. Ризвонов). – Бо анҷоми таҷдиди марҳилаи якум ва дуюми роҳи автомобилгарди Ваҳдат – Ҷиргатол – Саритоши Ҷумҳурии Қирғизистон корҳои сохтмонӣ дар марҳилаи сеюми шоҳроҳ аз деҳаи Сайрони ноҳияи Ҷиргатол то сарҳади Ҷумҳурии Қирғизистон босуръат идома дорад. Масофаи ин қисмати шоҳроҳ 89 километрро ташкил дода, айни ҳол дар бештари мавзеъҳои хавфнок корҳои таркишӣ, тахту ҳамворкунӣ ва васеъ намудани қисматҳои асосии роҳ дар арафаи анҷомёбист. Бо мақсади пеш бурдани корҳои сохтмонӣ беш аз 150 техникаҳои гуногунтамға сафарбар карда шудаанд. Сохтмончиён бо истифода аз имкониятҳои мавҷуда тасмим гирифтаанд, ки корҳои сохтмониро дар мӯҳлати муқараршуда ба анҷом расонанд.