ОЗАРБОЙҶОН БАРОИ ТОҶИКИСТОН АФСАРОНИ НИЗОМӢ ТАЙЁР МЕКУНАД

Душанбе, 3 август. (АМИТ «Ховар», Марзия Саидова).- Дар доираи тақвияти ҳамкориҳои низомии Ҷумҳурии Тоҷикистон ва Ҷумҳурии Озарбойҷон як гурӯҳ курсантҳои литсейи  ҳарбии ба номи генерал Мастибек Тошмуҳаммадов ҷиҳати идомаи таҳсил ба Озарбойҷон сафар карданд. Назар ба иттилои ҳамоҳангсози Маркази матбуоти  Вазорати мудофиаи ҷумҳурӣ Хусрав Аминов донишҷӯёни тоҷикро дар сафар ба Боку подполковник Баҳром Рустамов ҳамроҳӣ менамояд. Донишҷӯёни тоҷик муддати 5 сол дар литсейи ҳарбии ба номи Ҳайдар Алиев дар Боку ба таҳсил фаро гирифта шуда, баъди хатми он ҳамчун афсари артиши миллӣ  ба Тоҷикистон бармегарданд. Хусрав Аминов афзуд, ки тавофуқи таҳсили донишҷӯёни тоҷик  дар мактабҳои олии низомии Озарбойҷон зимни сафари вазири дифоъи ин кишвар Сафар Абиев дар соли 2009 ба Душанбе ба имзо расида буд.