ТАЙЁРӢ БА МАЪРАКАИ БАРӮЙХАТГИРӢ

Душанбе, 2 август. (АМИТ «Ховар», Дилшодаи Ҷонмард).-31 июл таҳти раёсати Сарвазири мамлакат Оқил Оқилов ҷаласаи  навбатии  Комиссияи мусоидат барои барӯйхатгирии аҳолӣ ва фонди манзил дар Ҷумҳурии Тоҷикистон  баргузор гардид. Дар ҷаласа дар хусуси рафти омодагӣ ба маъракаи муҳими барӯйхатгирии аҳолӣ ва фонди манзили Ҷумҳурии Тоҷикистон, ки аз 21-ум то 30 сентябри соли 2010 гузаронида мешавад, ҳисоботи масъулони соҳа шунида шуд.  Таъкид гардид , ки барӯйхатгирии аҳолӣ ва фонди манзил дар Ҷумҳурии Тоҷикистон ҳар даҳ сол як маротиба гузаронида шуда, маъракаи муҳими сиёсӣ ба ҳисоб меравад ва баргузории он барои муайян кардани дурнамои рушди ҷараёни иҷтимоию-иқтисодӣ, гирифтани маълумоти пурра ва дақиқ дар бораи шумора ва ҷойгиршавии аҳолӣ дар мамлакат,шумораи аҳолии аз ҷиҳати иқтисодӣ фаъол ва барои муайян кардани манбаъҳои асосии барои аҳолӣ ҳаётан муҳим аҳамияти калон  дорад. Оқил Оқилов роҳбарони сохторҳои марбутаро вазифадор кард,ки барои дар сатҳи баланд  гузаронидани барӯйхатгирии аҳолӣ ва фонди манзил дар Ҷумҳурии Тоҷикистон  аз хамаи имкониятҳои  мавҷуда самаранок истифода баранд ва дар ин самт ҳамоҳангии кори вазорату идораҳои дахлдори мамлакатро бо мақомоти иҷроияи маҳаллии ҳокимияти давлатии шаҳру ноҳияҳо  таъмин намоянд.  Хотиррасон бояд  кард, ки маъракаи қаблии  ба рӯйхатгирии аҳолии мамлакат моҳи январи  соли 2000 гузаронида шуда буд ва имсол дар баробари баргузории маъракаи ба рӯйхатгирии аҳолӣ  бори нахуст дар ҷумҳурӣ барӯйхатгирии фонди манзил низ гузаронида мешавад.