ТАСАЛЛИЯТИ ЭМОМАЛӢ РАҲМОН БА ПАЙВАНДОНИ ЗАФАР НОЗИМ

Президенти Ҷумҳурии Тоҷикистон, Ҷаноби Олӣ мӯҳтарам Эмомалӣ Раҳмон бо сабаби фавти сарояндаи шӯҳратёр ва маҳбуби мардум, Артисти халқии Тоҷикистон Зафар Нозим ба пайвандони маҳрум, хешу ақрабо ва мухлисони сершумори истеъдоди нодири ӯ изҳори тасаллият намуд.  Сарвари давлат аз ҷумла зикр намуд, ки тӯли даҳсолаҳо Устод Зафар Нозим гули сари сабади маҳфилҳо буд. Эҷодиёти пурғановати ӯ саршори эҳсоси баланди ватандӯстиву миллатпарастӣ, ваҳдату бародарӣ, эҳтиром ба модар мебошад ва чанд насли мардуми тоҷик бо сурудҳои ин марди бузурги ҳунар ба воя расидаанд. «Зафар Нозим мактаби эҷодии худро ба вуҷуд овард ва анъанаҳои ин мактаб бояд идома ёбанд», — таъкид намуд Президенти мамлакат Эмомалӣ Раҳмон.