ҲИФЗИ ЭКОЛОГИЯ- ВАЗИФАИ МУҚАДДАС

Душанбе, 17 сентябр. (АМИТ «Ховар», Дилшодаи Ҷонмард).- Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон дар ҳамкорӣ бо Хазинаи байнидавлатии ҳамкориҳои гуманитарии кишварҳои аъзои ИДМ аз 19 то 26 сентябри соли равон дар шаҳри Душанбе бо иштироки 42 намояндаи ҷавони ташкилотҳои давлатӣ ва ҷамъиятии давлатҳои ИДМ, ба монанди Озарбойҷон, Арманистон, Белорус, Қазоқистон, Қирғизистон, Молдова, Россия ва Тоҷикистон Лагери байналмиллалии таълимию экологии ҷавонон таҳти унвони «Экологияи Иттиҳод» ва Мактаби экологон ҷавонро баргузор менамояд.             Мақсади асосии Лагер ва Мактаби экологони ҷавон ин ҷалби ҷавонон барои иштирок дар ҳалли масъалаҳои экологии кишварҳои ИДМ; таъсиси бонки иттилоотии ташкилотҳои ҷамъиятии ҷавонони кишварҳои ИДМ; иштироки фаъол дар ҳифзи муҳити зист ва рушди ҳамкориҳои байналмилалии ҷавонон дар фазои ИДМ мебошад.