БАЛАНДТАРИН БИНО ДАР ДУШАНБЕ ҚОМАТ МЕАФРОЗАД

       Душанбе, 14 сентябр.(АМИТ «Ховар», Марзия Саидова).-Ба ифтихори 20-умин солгарди ҷашни Истиқлолияти давлатии Ҷумҳурии Тоҷикистон, ки соли 2011 таҷлил мегардад,  дар маркази пойтахт Маҷмааи тиҷоратии «Душанбе –Плаза» ба истифода дода мешавад. Бинои мазкур 20 ошёна буда, баландтарин бино дар пойтахт маҳсуб мешавад.       Тибқи иттилои сармуҳандиси Раёсати сохтмони асосии шаҳри Душанбе Рустам Муродов,  «Душанбе –Плаза» дар хиёбони Рӯдакӣ, бурриши кӯчаҳои Бухоро ва Бохтар аз ҷониби Ҷамъияти дорои масъулияти маҳдуди «Тоҷ-сохтмон –байналмилал» сохта мешавад. Алҳол, корҳои сохтмонӣ дар ин иншооти ҷашнӣ босуръат идома доранд. Маҷмааи тиҷоратии «Душанбе-Плаза» ба маблағи 99 миллион сомонӣ сохта шуда, тӯҳфаи хубест ба ҷашни 20-умин солгарди Истиқлолияти давлатии Ҷумҳурии Тоҷикистон.