ФАРОҒАТ ДАР «САРЕЗ»

Бадахшон, 29 сентябр. (АМИТ«Ховар», Л.Додо).- Тибқи маълумоти профессор, доктори илмҳои тиб Икром Бобохоҷаев дар ВМКБ 76 чашмаи обҳои шифобахш мавҷуд аст,  ки дар назди аксари онҳо истироҳатгоҳу ҷойҳои дамгирӣ сохта шудаанд.Истироҳатгоҳи «Сарез»-и  мавзеи Ҷелондеҳи ноҳияи Шуғнон яке аз онҳост. Одатан дар фасли баҳору тобистон ва аввали тирамоҳ нафарони зиёд барои табобату фароғат  ба ин  истироҳатгоҳ меоянд. Дар ин ҷо барои мизоҷон шароити хуби истироҳату фароғат  фароҳам оварда шудааст. Дар ихтиёри онҳо ду адад обзан (ванна), ошхона, утоқҳои хоб, утоқи муоинаи беморон ва толор барои бозии билярд гузошта шудааст. Азбаски теъдоди хоҳишмандони истироҳат дар ин осоишгоҳ сол ба  сол меафзояд, роҳбарияти  фароғатгоҳи «Сарез» ният доранд,  ки баҳори соли 2011 дар ин ҷо бинои нави меҳмонхона созанд. Ҳоло дар истироҳатгоҳ  дар як баст 100 нафар мизоҷ истироҳат мекунанд.