МУАРРИФИИ НИШОНАИ ЯГОНАИ ТУРИСТИИ ТОҶИКИСТОН

Душанбе, 20 сентябр. (АМИТ «Ховар», Дилшодаи Ҷонмард).-27 сентябри соли равон дар шаҳри Душанбе нахустин Конфронси миллии саноати туристии Ҷумҳурии Тоҷикистон баргузор мегардад.             Дар ин конфронс мавзӯъҳои  нақшаҳои ояндаи Иттиҳоди Аврупо оид ба ҳамкорӣ дар соҳаи туризм, тадбирҳои андешидаи мақоми давлатии соҳаи туризм ҷиҳати инкишофи устувори соҳа, саҳми шарикони байналмилалии Кумитаи  ҷавонон, варзиш ва сайёҳии назди Ҳукумати Ҷумҳурии Тоҷикистон дар рушди соҳаи туризм, аҳамияти ёдгориҳои таърихӣ дар рушди туризми кишвар, саҳми Вазорати корҳои хориҷӣ дар пешбурди соҳаи туризми мамлакат, таъмини бехатарии сайёҳон ҳамчун омили пешбарандаи соҳа баррасӣ мегарданд.              Инчунин, дар конфронси мазкур нақши ширкатҳои туристӣ дар инкишофи соҳаи туризм, саҳми ширкатҳои ҳавопаймоӣ дар зиёд гаштани ташрифи туристони хориҷӣ ба кишвар ва бахши маориф дар таъмини кадрҳои баландихтисоси соҳаи туризм ба бозори хизматрасонии туристӣ ва амсоли инҳо матраҳ хоҳанд шуд.             Мавриди зикр аст, ки дар конфронси мазкур муаррифии нахустин филми тарғиботии туристӣ ва нишонаю шиори ягонаи туристии Тоҷикистон муаррифӣ хоҳад шуд.