МУҲАММАД РОСИЙД БА ДУШАНБЕ МЕОЯД

Душанбе, 8 октябр.(АМИТ «Ховар», Марзия Саидова).-Ҳайати парлумонии Ҷумҳурии Индонезия  таҳти роҳбарии Муҳаммад Росийд Ҳидоят 11-14 октябри соли равон аз Ҷумҳурии Тоҷикистон дидан менамояд.      Интизор меравад, ки раҳбари ҳайати парлумонии  Индонезия зимни сафараш ба Тоҷикистон бо Раиси Маҷлиси  намояндагони Маҷлиси Олии Ҷумҳурии Тоҷикистон Шукурҷон Зуҳуров мулоқот намуда, масъалаҳои  тақвияти ҳамкориҳои парлумонии Тоҷикистону Индонезияро баррасӣ менамоянд. Ҳамзамон, Муҳаммад Росийд Ҳидоят бо вазири корҳои хориҷии Ҷумҳурии  Тоҷикистон Ҳамрохон Зарифӣ, масъулини Палатаи савдо ва саноати ҷумҳурӣ ва корхонаи «ТалКо» мулоқот хоҳад кард.          Тибқи иттилои котиби матбуотии палатаи поёнии парлумони мамлакат Муҳаммадато Султонов ҳадафи сафари ҳайати парлумонии Индонезия ба Тоҷикистон  тавсеаи ҳамкориҳои мутақобилан судманди парлумонӣ байни ҳар ду кишвар аст.         Муносибатҳои дипломатии Ҷумҳурии Тоҷикистон ва Ҷумҳурии Индонезия  27 августи соли 1994 барқарор шуда, маҷмӯи санадҳои муҳими байнидавлатӣ дар бахшҳои гуногун байни ҳар ду кишвар  ба тасвиб расидаанд.