ШАҲРДОРӢ МАНЗИЛҲОИ АРЗОН МЕСОЗАД

    Душанбе, 5 октябр.(АМИТ «Ховар», Марзия Саидова).- Дар доираи “Барномаи комплексии рушди сохтмони манзил дар шаҳри Душанбе барои солҳои 2007-2015» шаҳрдорӣ барои сохтмони манзилҳои нисбатан арзон афзалият дода, ба ширкатҳои татбиқи ин ташаббус имтиёзҳои андозӣ муқаррар месозад. Ин матлабро Раиси шаҳри Душанбе Маҳмадсаид Убайдуллоев дар ҷаласае, ки бо ҳузури кормандони бахши сохтмони шаҳр, ширкатҳои лоиҳакашию сохтмонии ватанию хориҷӣ баргузор шуд, матраҳ кард. Ҳадафи ин иқдом дастрасии сокинон ба манзилҳои камарзиш ва беҳдошти вазъи рӯзгори онҳо аст.    Тибқи итттилои котиби матбуотии Раиси шаҳри Душанбе Шавкат Саидов, иқдоми мазкур вақтҳои наздик бо қабули қарори дахлдор аз ҷониби Раиси шаҳр, ҳукми воқеӣ хоҳад гирифт.    Дар ҷаласа, инчунин, масъалаҳои дигари мубрами хоҷагидории шаҳр баррасӣ гардида, ба масъулин дастуру супоришҳои мушаххас дода шуд.