ЗАБОНИ ТОҶИКИРО ЧУН НИШОНИ ҲАСТИИ ТОҶИК ҚАДР КУНЕМ!

     Душанбе, 5 октябр. (АМИТ «Ховар», Бекназари Абӯбакр). — Имрӯз дар Ҷумҳурии Тоҷикистон Рӯзи забон бо тантана таҷлил гардид. Ба ин муносибат дар Театри драмаю мусиқии ба номи Камоли Хуҷандӣ чорабиниҳои мутантан баргузор гардид.    Раиси шаҳри Хуҷанд Содиқҷон Мирхолиқов дар ин ҷамъомад ҳозиринро ба ифтихори Рӯзи забон табрик намуда, гуфт, ки рӯи кор омадани ҳуҷҷати муҳими давлатӣ — Қонуни Ҷумҳурии Тоҷикистон дар бораи забон воқеаи барҳақ таърихист ва он дар тақдири минбаъдаи халқу миллати куҳанбунёди тоҷик, шинохти асл ва ҳуввияту худшиносии миллии миллионҳо тоҷикони рӯи олам масъулият, нақш ва мақоми бузургеро ба дӯш дорад.    «Вазифаи мо – имрӯзиён забони тоҷикиро чун нишони ҳастии тоҷиканд қадр кардан, эҳтиёт намудан, гиромӣ доштан, ғановат бахшидан аст. Қабули Қонуни нави забон ифодагари ҳамин масъулият ва ҳамин маъниҳост», — хитоб кард С. Мирхолиқов.    Ёдовар мешавем, ки то ҳамин сол Рӯзи забон санаи 22 июл таҷлил мегардид. 5 октябри соли 2009 Қонуни нави забон қабул шуд ва аз ин пас таҷлили Рӯзи забон ба ин сана иваз карда шуд.